“Ji ber ji bo min wateya jiyanê, di jiyana azad a jinan de şênber dibe.”

Ji Bo Konferansa Jineolojî ya Ewropayê Peyama Rêber Abdullah Ocalan
 
Hevrêyên Hêja!
 
Barhilgirên bîrewerî û kedê yên Jineolojî, avakerên jiyana azad!

Lêgerînekî min heye ku ji zarokatiya xwe ve di dilê xwe de hildigirim; dîtina hebûna azad a jinan û vekirina qadekî jiyanê ya hêjayî wan. Dema hevalên min ên zarokatiyê ji nava leyistokan girtin û birin, dema xwişka min di berdêla kîsek savar de çû, ev lêgerîn hîn kûrtir bû. Di berxwedana bêdeng a jinên gund de û di bilindbûna yên bermayên xwedawendan de min dît ku rizgarî pêkan û mûmkun e; min jî li pey vê baweriyê baz da. Min her tim şopên wan şopand. Ji ber min dizanî, birîna herî kûr a civakê, kolekirina jinan bû. Beyî ku ev were fêmkirin ne azadî, ne wekhevî ne jî demokrasiyeke rast ne mumkun bû.

Dema min Jineolojî danî holê, armanca min tenê ne hilberîna têgînekê bû. Jinûve pênasekirina hebûna jinê bi rastiya wê ya dîrokî û civakî; derxistina wê ji objebûnê û ew kirina kirde, wê bûba karê me yê herî jiyanî ku ji dîrokê re bimîne. Min xwest zanabûna xwedawendan ku şaristaniya mêrsalar bi hezaran salane ser wê nixûmandiye û şêwaza jiyana  jin-navend a serdema Neolîtîkê, ji nû ve derxim ser rûyê erdê. Xencera di pişta civakê de kolebûna jinê bû, beyî ku ew xencer were derxistin, ti pirsgirêk nedikarî were çareserkirin. Jineolojî weke zanisteke ku vê xencerê pênase dike, ji cihê wê derdixe û diavêje û şûna wê zanîna jiyana azad datîne za û welidî.

Heta îro keda ku bi navê Jineolojî hate dayîn, tiştên hatin nivîsandin, nîqaşkirin û rêxistinkirin nîşan dan ku ev zanist di heman demê de şêwazekî jiyanê ye. Ji bo perspektîfa jinê weke bêhnekê, henaseyekê bû. Paqijkirina nasnameya jinê ji hêmanên zayendperest, afirandina qadeke raman û çalakiyê ya jinê, deyn û peywira herî jiyanî bû ku ji dîroka mirovahiyê re bê hiştin. Ev bûn qada herî bingehîn ya mijûlbûn û têkoşînê ya Jineolojiyê. Dustûra, ‘’Mirov jin nayê dinê, dibe jin’’ giring e. Lê pêwiste ev hebûn ne di sînorên mêr disepîne û ferz dike, divê bi hêza cewherî ya jinan pêk were. Ji ber vê me got, divê her jinekê odeyek ayîdî xwe hebe, divê her jinekê dengê xwe û zanîna xwe hebe.

Wekî mêrekî di vê pêvajoyê de min xwe herdem lêpirsîn kir û nû kir. Me li vê jî wateyek bar kir, me kir armanc ku ji mêrtiya serdest a sedan salan bi veguherînê rizgar bibin. Min got rêgeza bingehîn a sosyalîzmê azadiya jinê ye. Ji ber pîvana sosyalîstbûna mêrekî ya rast, bi jinê re danîna têkilî û peywendiyeke rast, wekhev û azad e. Di piraniya ezmûnên mezin ên sosyalîst ên dîrokê de ev rêgez kêm ma. Vê kêmasiyê hişt ku şoreş nîvço bimînin. Min hewl da vê kêmasiyê derbas bikim, bibim hêjayî xwedawendan. Veguherandina mêr û tevî jinê azadkirina wî, ji bo min bû wezîfe û peywirekî jêneger.

Îro li ber me pêvajoyekî nû heye. Qasî ku pêvajoyeke lêgerîna aştî, demokrasiyêû mûzakereya siyasî ye, ewqas jî pêvajoyeke civakî ya jinûve avakirinê ye.

Ew ê pêşengiya vê înşa û avakirinê jin bigirin ser milên xwe. Ji ber ku ji nivîzêdetir ê her gava giring ku heta îro serketî ye bi ked, berxwedan û hişê jinê pêk hatiye. Ji îro û pê ve jî dê wisa be. Pêwiste jineolojî berdewam bibe zemînê zanistî û birdozî yê vê pêşengiyê.

Her kêliya ku hûn pêwist bibînin ez ê bi we re bim, bi we re bifikirim û hilberînim. Ji ber ji bo min wateya jiyanê, di jiyana azad a jinan de şênber dibe.

Ev konferans bila bi qasî paşeroj û raboriyê, li ser pêşeroja jineolojî jî biaxive. Bila hebûna jinê rast pênase bike. Zanîna jiyana azad mezin bike. Projeya min a nîvço mayî, bi hêza van gotûbêj û nîqaşan dê xwe temam bike. Baweriya min a bi we tam e. Ji bîr nekin ku herdem bi we re me.

Bi bêrîkirin û heskirina min a bê dawî
 
Abdullah Ocalan -Îmralî